Европската Комисија (ЕК) верува дека трговскиот договор со САД е „достапен“, но е подготвена да примени контрамерки во случај на неуспех, изјави денес извршниот портпарол на ЕУ, Олоф Гил.
„ЕУ продолжува со интензивните преговори со САД за царините и е фокусирана на наоѓање договорено решение за кое верува дека е достапно“, рече Гил.
Но, во исто време, е подготвена да одговори со контрамерки на 7 август доколку е потребно, додаде тој.
Земјите-членки во четврток го одобрија предлогот на ЕК за контрамерки во вредност од 93 милијарди евра што би се примениле на 7 август доколку преговорите со САД не резултираат со договорено решение.
Земјите-членки одобрија список на американски производи во вредност од 72 милијарди евра за кои би се вовеле царини. Претходно беше усвоен список на производи во вредност од 21 милијарда евра.
Моментално, на сила е основна царинска стапка од 10 проценти за европските производи извезени во САД, со царини од 25 проценти за автомобили и 50 проценти за алуминиум и челик.