Две минути, 11 секунди и 4 стотинки е новиот македонски рекорд на Игор Стефановски Иџе, кој го постави на вчерашната трка „Водно 2013“ со својот нов автомобил „Мицубиши Лансер Ево IX“.
Со овој резултат Иџе го собори претходниот рекорд од 2 минути 12 секунди и 14 стотинки и го освои првото место во конкуренција од 30 натпреварувачи од Македонија, Србија, Хрватска, Црна Гора и Бугарија.
– Иако беше врнежливо, успешно се справив со мократа патека и мислам дека постигнав одличен резултат. Победив во Генералниот пласман и во мојата група. Многу сум задоволен, бидејќи го исполнив ветувањето. Сега сум подготвен за следните предизвици. Доколку нештата се одвиваат во најдобар ред, планирам пред „Награда Малачке“ во Хрватска да настапам на трка во Чешка од Европското првенство, изјави Стефановски по завршување на трката.
До крајот на овој месец на возилото ќе се извршат сите потребни ревизии и подготовки за следниот настап на Стефановски на ЕП Чешка кое ќе се одржи на 1 и 2 јуни.