Полицијата и армијата на Тунис од вчера се во потрага по 30 осомничени припадници на Ал Каеда, во близина на границата со Алжир, а претседателот Монсеф Марзуки отпатува во таа област за да ја надгледува операцијата.
Портпаролот на министерството за внатрешни работи изјави дека во градот Ел Кеф имало околу десет екстремисти, а дваесетина во областа Маунт Чамби на западниот дел од државата, каде што изминатите недели имаше судири помеѓу полицијата и екстремистите.
Според извор од Министерството за внатрешни работи, кој сакаше да остане анонимен, групата во Маунт Чамби е составена од девет Тунижани и 11 Алжирци, пренесе „Ројтерс“.
Повикувајќи се на неименувани извори, алжирските медиуми соопштија дека војската од понеделник е во состојба на приправност за да ги спречи екстремистите да заминат од Тунис.
Портпаролот на туниското министерство за одбрана Мохтар бен Наср изјави дека терористите се уште се во фаза на подготовки и складирање на оружје.
-Тие се обидуваат од Маунт Чамби да направат седиште за своите операции. Тука пронајдовме 16 магацини со оружје, кое го користи оваа група, како икниги, храна и материјал за експлозивни направи – рече тој.
Елена Георгиевска