Од скопски Водовод и канализација информираат дека вкупно околу 50 компании испратиле апликации на повикот за избор на најповолен понудувач за проектирање и изградба на постројка за третман на отпадни води во главниот град, а рокот за поднесување пријави е продолжен до 1 септември.
„Со потпишување на Договорите помеѓу Владата на Република Северна Македонија и Европската Инвестициона Банка и Европската Банка за Реконструкција и Развој се затвори финансиската конструкција за Проектот за Изградба на Пречистителна Станица на град Скопје, во вредност од 136.000.000 евра,“ велат од Водовод и канализација.
„Во моментов тече рокот за поднесување апликации за претквалификации за избор на најповолен понудувач за проектирање и изградба на постројка за третман на отпадни води Скопје. Досега околу 50 компании појавија интерес за преземање на документите за аплицирање. Со цел да се излезе во пресрет на потенцијалните апликанти и заинтересеирани страни, рокот за поднесување на апликациите се продолжува, па наместо на 17.08.2020 истиот истекува на 01.09.2020 во 12 часот по локално време,“ се вели во соопштението.
Заинтересираните страни кои ќе испратат електронска апликација до 01.09.2020, најдоцна до 14.09.2020, 12 часот (по локално време) ќе треба да ја достават апликацијата и во печатена форма. Со цел зголемена транспарентност, апликантите ќе можат да го следат отворањето на апликациите преку преку видео конференциска врска, додаваат од Водовод и канализација.