Местење на масите, редење на фрижидерите, дезинфекција на столчињата и масите. Вака денеска изгледаат кафулињата, рестораните и кафеаните, каде се прават последните подготовки пред утрешното отворање на угостителските објекти.
Повеќе од два месеци угостителите не работеа. На 12 март беше донесена одлуката угостителските објекти да работат до 18 часот, а само два дена подоцна, беше донесена одлука за нивно целосно затворање.
Сега, тие ќе работат според строго утврдени протоколи.
На една маса во угостителски објект ќе можат да седат до четири лица, а угостителите ќе работат до 20 часот. Нема никакво ограничување дека лицата треба да се членови на исто семејство, a задолжително е да има растојание меѓу масите.
Засега, отворени ќе бидат само терасите, односно надворешниот дел од угостителските објекти, а за работата во затворениот простор ќе се одлучува во втората фаза.
Угостителите велат дека со новите протоколи, малиот број на маси, скратеното работно време до 20 часот и намалениот капацитет на гости нема да успеат да остварат профит, но се надеваат дека со тек на време работите ќе се вратат во нормала.