Посебни правила и ограничувања на движењето важат за прифатните центри за бегалци и мигранти во цела Грција, согласно министерската одлука издадена од Министерствата за здравство, за миграција и азил и за цивилна заштита на Грција, јави дописничката на МИА од Атина.
До 21 април 2020 се ограничува движењето и во периодот од 7 до 19 часот дозволен е излез од камповите на претставник на семејствата или групите само за да се покријат основните потреби за снабдување со прехранбени продукти, додека пак предвидени се специјални здравствени единици, за доколку се појави случај на коронавирус, веднаш да реагираат.
-„Остануваме дома“ важи за сите. Со одговорност на грчката полиција, ќе бидат дозволени логични движења и само за да се покријат основните потреби помеѓу 7 и 19 часот, вели министерот за миграција и азил на Грција, Нотис Митаракис, во однос на одлуката на трите министерства.
Целта на мерките е превенција од Ковид-19 во центрите за прием и регистрација на бегалци и мигранти.
Говорејќи за грчкото радио „Параполитика“, Митаракис рече дека за сега не е регистриран ниту еден случај на коронавирусот во бегалските кампови, а кога постојат симптоми се прават истите тестови и анализи, како и за сите други.