Здружението на новинарите денеска промовираше Новинарски прирачник за следење на избори.
Новинарот Ердем Ахмет на прес-конференција изјави дека целта не е да се научат новинарите како да следат избори, бидејќи тие си ја знаат работата, туку да го имаат прирачникот со себе и да се потсетат на одредени правила. Најважно, според него, е да се почитува етичкиот кодекс, кој не се однесува само на изборите туку воопшто.
Прирачникот, направен во џебно издание, содржи дел посветен на улогата на медиумите за време на изборите, на новинарската етика и изборите, дел за изборни нерегуларности, за јавниот сервис, Кодексот на новинарите и изборите, Меѓународната правна рамка за слободата на изразување, Македонска правна рамка за медиумско следење на избори и правилници за и пред изборната кампања.
Претседателот на новинарите Насер Селмани рече дека медиумите играат важна улога во обезбедување демократски амбиент за одржување фер и демократски избори.
– Изборите не се важни само за политичарите, кои за да ја добијат довербата на граѓаните даваат разни ветувања, туку се и за обичните граѓани.
– Обврска на новинарите е да бидат меѓу нив и да ги пренесат нивните грижи, изјави Селмани.