Општина Кавадарци започна со реконструкцијата на главниот мост на реката Луда Мара во центарот на градот. Одлуката за санација беше донесена минатата година од Советот на општината, откако во сообраќајна незгода беше оштетена оградата на мостот.
– Мостот е граден во педесетите години на минатиот век, а во шеесетите е доградуван и обновен. Тогаш се проширени двете пешачки патеки во сегашната форма. Сегашната статика на мостот е добра за што доказ е фактот што мостот има издржано неколку поплави. Се работи за симболот на градот, поврзан со многу историски случувања во последните шеесетина години, изјави градоначалникот на Кавадарци Александар Панов.
Нагласи дека целосно ќе биде заменета оградата, а мостот ќе добие и ново подобро осветлување.
Инвестицијата е во вредност од два милиона денари, а средствата се обезбедени од општинскиот буџет.