Додека Охрид размислува, екологистите укажуваат дека за мораториум за градење нема законска пречка уште од 2017 година кога таква препорака стигна од УНЕСКО. Наспроти очекувањата градоначалникот на Охрид, Константин Георгиески, веднаш да закаже седница на Советот со мораториум на дневен ред, тој денес преку соопштение до медиумите кусо извести дека ќе ги разгледаат законските можности за мораториум.
„Општинските надлежни служби ќе ги разгледаат законските можности во однос на владината препорака за прогласување мораториум на градежните активности до донесување на Планот за управување со природното и културно наследство“, стои во соопштението.
Градоначалникот Георгиески денес беше презафатен да одговори на прашањата од „А1он“ во врска со препораките од Владата. На неговиот мобилен телефон се јавуваше секретарката, која љубезно објаснуваше дека градоначалникот е на состанок.
На прашањата кога е следната седница на Општина Охрид и дали мораториумот ќе биде на дневен ред, не одговори ниту одделението за односи со јавност на Општина Охрид.
Еколошкото здружение „Фронт 21/42“ потсетува дека услови за мораториум во Охрид постојат од 2017 година.
„Уште од 2017 година нема никакви законски пречки за прогласување мораториум за градење. УНЕСКО уште тогаш, во 2017, испрати препораки за мораториум на урбанизацијата на крајбрежјето, а посочи и дека треба да се стопира легализацијата на дивоградбите. Се сменија градоначалниците, но ниту еден не одлучи да прогласи мораториум“, вели Александра Бујаровска од „Фронт 21/42“.
Таа вели дека за официјална реакција по повлекувањето на Планот за управување со природното и културно наследство ќе чекаат записник од седницата во кој очекуваат дека биде образложена причината за неговото повлекување и следните чекори во врска со овој план.
Градоначалникот на Охрид, Константин Георгиески, освен дека ќе ја разгледаат можноста за мораториумот, денес извести дека во рок од 10 дена ќе изготват акциски план со роковник за спроведување на препораките на УНЕСКО.