Научната фела во земјава преку системот на мерни станици располага со многу податоци и сознанија за аерозагадувањето, но во пракса тие малку се користат, рече денеска заменик министерот Јани Макрадули.
На средбата со ректорот на Универзитетот „Гоце Делчев“ (УГД), Блажо Боев и со раководителот на лабораторијата „Амбикон“ при УГД – Штип, Дејан Мираковски, Макрадули разговараше околу можноста овие мерни станици да бидат дел и од државната мрежа.
Во фокусот беше и предвидувањето на аерозагадувањето со помош на различни техники и технологии.
– Верувам дека тоа ќе стане наша реалност од следната зима и дека граѓаните ќе можат да знаат што ги очекува во следните три до пет дена. Во една поинтензивна соработка меѓу универзитетите и факултетите очекувам не само решенија што ќе бидат применливи, туку и решенија кои ќе бидат место и плодна почва за аплицирање на многу меѓународни проекти за да можеме со повеќе ресурси да се справуваме со аерозагадувањето, напомена заменик-министерот.
Според Макрадули, набавката на нови автобуси во Скопје и донесувањето на законот за возила по претседателските избори со кој ќе се намали увозот на стари, половни автомобили, се само дел од мерките кои би требало да го намалат загадувањето.
-Очекувам Собранието, во моментот кога ќе почне да работи, да го донесе законот за возила и тоа е една од мерките со кои, сметам, ќе се зголеми бројот на нови возила и ќе се намали бројот на старите што се увезуваат. Исто така, и подобрување на јавниот транспорт, како што е набавката на новите автобуси во Скопје. Тие се методите и во тој правец одиме, истакна Макрадули, додавајќи дека работна група составена од претставници на министерствата за животна средина и за финансии, како и од Царинската управа, веќе работат на регулирање на таксите што се плаќаат врз основа на издувните гасови.
Повтори и дека регионалното менаџирање на отпадот е единственото и најдобро решение за справување со дивите депонии.
-Недозволиво е цела држава да биде заложник на непознавањето на неколку општини кои го кочат процесот каде што егизистираат десетици диви депонии, а не сакаат да направат фабрика што ќе произведува електрична енергија, потенцира Макрадули.
Како што информира, со зголемен буџет за 100 проценти и нови 14 вработени, се засилува капацитетот на Државниот инспекторат за животна средина. Но, за да се зголемат контролите врз загадувањето ќе се интервенира и во Законот за инспекциски совет, а целта е ингеренции во овој сегмент да добијат и локалните самоуправи.
Советодавното тело во кое ќе членуваат универзитетски професори и експерти ќе треба, меѓу другото, сите досега добиени резултати, апликации и податоци да ги стави на едно место и во служба на ефикасна имплементација.