Поранешната градоначалничка на Скопје, Данела Арсовска два дена по ред потсетува и прашува што станува со кривичната пријава која ја поднесе за утврдено загадување.
„Според податоците на меѓународната платформа Climate TRACE, Цементара Титан Усје е идентификувана како еден од најголемите извори на загадување со ПМ2.5 честици, рангирана меѓу првите 10% емитери на ГЛОБАЛНО ниво.
ПМ2.5 честиците се меѓу најопасните за здравјето, при што предизвикуваат сериозни срцеви и белодробни заболувања, особено кај децата, повозрасните и хронично болните.
Пред 3 години лично поднесов КРИВИЧНА ПРИЈАВА за утврдено загадување, но Јавното обвинителство до денес нема преземено никаква постапка против Титан Усје. Овој молк е подеднакво загрижувачки како и самото загадување.
Дополнително, достапните докази на платформа Climate TRACE покажуваат дека нивното загадување не е локализирано само на Скопје, со што негативното влијание врз здравјето и животната средина се шири низ Македонија“, напиша во петокот Арсовска, по најавите за протести против загадување од УСЈЕ.
Вчера, Арсовска продолжи со повикот.
„За ТИТАН УСЈЕ, Јавното обвинителство 3 години сеуште нема постапено по КРИВИЧНАТА ПРИЈАВА која ја поднесов по утврденото загадување од нивна страна.
Цементарата ТИТАН УСЈЕ согорува 4400 тони отпад годишно и е НАЈГОЛЕМ увозник на ОТПАД во Македонија.
Прашајте ги барем од Јавното обвинителство до каде се со постапката, бидејќи за политички цели постапуваат ИТНО, а кога животот на сите ни е загрозен од секојдневно труење СИ МОЛЧАТ“, напиша Арсовска.