Над 70 пријавени кандидати има на огласот за нови седум членови на Државната комисија за спречување на корупцијата (ДКСК), што значи дека за едно место ќе се тркаат повеќе од 10 луѓе, На огласот, како што дознаваме, пријавени се адвокати, обвинители, ревизори, новинари, економисти, политиколози.
Меѓу нив се и Ангеле Илиевски, адвокат на Зоран Верушевски кој моментално е член на Советот на јавни обвинители, Горан Митевски – ексдиректорот на УБК, обвинителот од случајот „Пуч“ Златко Биковски, Максим Ацевски, ревизор од Државниот завод за ревизија, поранешниот обвинител Александар Наков. Меѓу пријавените има и двајца новинари, Горан Трпеноски и Џељаљ Незири. На огласот се пријавила и Софка Пејовска Дојчиновска, поранешен генерален секретар во Антикорупциската комисија, понатаму Маја Малахова, поранешна судијка и претседателка на Државната комисија за жалби по јавни набавки, Злате Димовски од Факултетот за безбедност, Чедомир Дамјановски од Лустрациската комисија, Тања Алтанџиева, поранешна членка на ДИК и многу други.
Новиот Закон за спречување на корупцијата има построги критериуми за избор на седумтемина членови на ДКСК, односно тие не смеат да бидат членови на политички партии ниту, пак, донатори на партија, треба да имаат најмалку шестгодишно искуство во откривање случаи на криминал и корупција, а на конкурсот не смеат да се пријавуваат лица што претходно биле членови на антикорупциската комисија.
Комисијата за прашања на изборите и именувањата на Собранието во рок од три дена по завршувањето на огласот треба да формира седмучлена комисија за селекција на кандидатите која ја сочинуваат Мухамед Зекири од СДСМ, Артан Груби од ДУИ, Зоран Илијоски од ВМРО-ДПМНЕ и Владанка Авировиќ од независната пратеничка група на ВМРО-ДПМНЕ од редовите на пратениците, а како претставници по предлог на Владата, во заедничка соработка со граѓанскиот сектор, назначени се Сабина Факиќ и Бесим Небиу. По предлог на Народниот правобранител член на комисијата ќе биде и адвокатот Драги Целевски, поранешен заменик-народен правобранител.
Кога ќе се направи селекција на кандидатите што ги исполнуваат условите, во рок од 5 дена ќе се врши интервјуирање на кандидатите, кое ќе се емитува на собранискиот канал.
Новиот закон им дава и поголеми овластувања на новите антикорупционери. Во него се предвидува тие да имаат директен пристап до банкарските сметки на функционерите, до сметките на политичките партии, како и увид во над 60 дата-бази. За предметите што ќе бидат отворени, новиот закон предвидува рокови за нивно завршување за да не дојде до одолжување на постапките.
Државната комисија за спречување на корупцијата не функционира цела цела година бидејќи 5 члена си дадоа оставки по отворањето на скандалот за исплата на фиктивни патни налози и незаконско трошење на буџетските пари.
Мери Јордановска и Васко Маглешов