Украина победи на синоќешниот избор за песна на Евровизија, а украинскиот претседател Володимир Зеленски вети дека ќе даде се од себе неговата земја да биде домаќин на настанот следната година.
Победникот на натпреварот традиционално е домаќин на финалето следната година, но со жестоките борби кои се уште траат во Украина, не е јасно каде би се одржала маифестацијата во 2023 година.
„Нашата храброст го воодушеви светот, а нашата музика ја освои Европа. Следната година Евровизија ќе биде во Украина, по трет пат во историјата. Еден ден настанот ќе се одржи и во Мариупол, ослободен, мирен и обновен напиша украинскиот претседател Володимир Зеленски на Фејсбук по победата на украинските претставници во Торино.
Зеленски им се заблагодари на Калуш Оркестар за победата и на сите што гласаа за Украина.
„Сигурен сум дека нашиот победнички акорд во борбата против непријателот не е далеку“, додаде тој.
Оркестарот Калуш победи на Евровизија со песната „Стефанија“ на бран масовна јавна поддршка. Песната на украински јазик е спој на рап и традиционален фолк и е посветена на мајката на пејачот.
Украина беше само четврта по гласањето на жирито, но освои убедливо најмногу гласови од публиката, што на крајот и донесе победа со вкупно 631 поен.
„Помогнете им на Украина и Мариупол! Помогнете му на Азовстал“, извика пејачот на бендот Олех Псиук по настапот.
Политички пораки на Евровизија не се дозволени, но организаторите најавија дека ги разбираат длабоките чувства за Украина и дека сите изрази на поддршка за таа земја ги сметаат за повеќе хуманитарни отколку политички.