Министерството за надворешни работи на Русија најави дека ќе побара официјално објаснување од властите во Париз во врска со изјавата на францускиот претседател Емануел Макрон дека „руски медиуми се мешаат во внатрешните работи на Франција“ кога се во прашање протестите на „жолтите елеци“.
„Ако медиумите се пренеле коректно, тогаш претседатлот Макрон е главен творец на лажни вести во Франција и сите негови напори во борба против оваа појава се само привидни, објави портпаролката на руското Министерство за надворешни работи„, Марија Захарова на „Твитер“.
Реакцијата на Захарова следи откако Макрон изјави дека руски медиуми ги користат своите налози на социјалните мрежи за мешање во внатрешните работи на Франција.
Захарова, при тоа, ги отфрли обвинувањата дека руските медиуми РТ и Спутњик, „купуваат налози на социјалните мрежи“, преку кои шират невистини.
„Француската држава повеќепати бараше да докажеме дека овие обвинувања се основани, но ние не можевме да дојдеме до докази, затоа што тоа се лаги“, порача Захарова.
Според неа, руските медиуми често ги прашуваат за коментар учесниците на протестните собири во Франција, затоа што француските власти одбиваат да комуницираат со нив.
„Макрон мора да заборавил дека и сам им забранува на руските новинари да присуствуваат на неговите прес-конференции. Затоа новинарите не ги интервјуираат официјалните претставници, туку „идиотите во жолти елеци“, како што ги нарече Макрон“, додава Захарова.