На почетокот на средбата, претседателот на Русија ги поздрави Вучиќ и српската делегација и рече дека високо го цени тоа што дошол во Москва на парадата по повод 80-годишнината од победата во Втората светска војна, покрај притисокот, иако се обидувале да го убедат да не учествува и покрај сите логистички проблеми.
„Почитуван господине претседателе, драг пријателе, дозволете ми топло да ве поздравам во Москва. Искрено го цениме тоа што сте со нас на овој значаен ден и што лично учествувате во празничните настани“, му рече Путин на Вучиќ.
Путин истакна дека руските и српските војници се бореле рамо до рамо против нацистичките окупатори – рече Путин и истакна дека се сеќава на разговорот со Вучиќ по повод 80-годишнината од ослободувањето на Белград.
„Ова е наш заеднички празник, нашите воини се бореа рамо до рамо против нацистичките окупатори и добро се сеќавам во врска со ова на нашиот телефонски разговор на 20 октомври 2024 година, по повод 80-годишнината од ослободувањето на Белград од германските фашистички окупатори. Белградската офанзива, операцијата на Советската армија заедно со единиците на Народноослободителната армија на Југославија, стана еден од клучните настани во последната фаза од Втората светска војна. Знаеме со колку почит владата и народот на Србија се однесуваат кон споменот на паднатите борци за слободата на нашите земји“, рече Путин.
Како што изјави тој, пријателството меѓу братските народи е формирано во тие сурови воени години и тоа е сигурна основа на стратешкото партнерство меѓу Русија и Србија, кое има конструктивен и заемно корисен карактер.
„Го цениме независниот и суверен курс на Србија во меѓународните односи. Руско-српскиот дијалог се одвива конзистентно, па затоа на 7 март имавме детален телефонски разговор во кој разговаравме за актуелните прашања од нашата соработка. Во февруари оваа година, во Москва се одржаа суштински преговори меѓу раководителите на одделите за надворешна политика, а се одржуваат редовни контакти меѓу надлежните министерства, меѓу парламентот“, рече рускиот претседател.
Тој вели дека „Газпром“ е сигурен снабдувач и одговара на барањата на Србија и обезбедува дополнителни испораки на гас покрај оние предвидени во договорите.
„Русија е сè уште клучна за енергетската безбедност на Србија и обезбедува 85 проценти од енергијата што ѝ е потребна на Србија. Снабдувањето со гас оди преку Турција, Газпром не е само сигурен снабдувач, туку обезбедува и дополнителни количини што ѝ се потребни на Србија. Ќе ги разгледаме сите актуелни прашања за руско-српската соработка и ќе видиме што можеме да направиме за во иднина“, рече претседателот Путин на почетокот од состанокот.
Претседателот на Србија, Александар Вучиќ, денес му изрази благодарност на претседателот на Русија, Владимир Путин, за неговата огромна поддршка за територијалниот интегритет и суверенитет на Србија и посочи дека заедничка задача на двете земји е да не дозволат ревизија на историјата.
На почетокот од средбата со Путин во Кремљ, Вучиќ му се заблагодари на претседателот на Русија за гостопримството и уште еднаш му го честита празникот, 80-годишнината од победата во Големата патриотска војна.
„Ова е многу важен ден за нас, за Србите. Горди сме на улогата на нашиот народ во ослободувањето на нашата земја од нацистичките освојувачи и сме многу благодарни на Црвената армија, на Советската армија за тоа што одиграа голема улога во тоа ослободување“, рече Вучиќ, зборувајќи на руски јазик.
Вучиќ му се заблагодари на Владимир Путин за неговата поддршка во зачувувањето на суверенитетот на Србија и додаде дека се согласува оти е потребно да се зголеми билатералната размена меѓу двете земји и дека постои потенцијал за тоа.
„Се надеваме дека ќе можеме да ги одржиме сегашните услови кога станува збор за гасниот аранжман, а можеби дури и да ги подобриме, ако можам така да кажам“, рече Вучиќ.
Тој истакна дека Русија и Србија не треба да дозволат ревизија на историјата и рече дека се надева дека ќе се видат во Белград.
На состанокот присуствуваа и шефот на руската дипломатија Сергеј Лавров и портпаролот на Кремљ Дмитриј Песков, рускиот министер за економија Максим Решетников, директорот на Росатом Алексеј Лихачов, директорот на рускиот инвестициски фонд Кирил Дмитриев – главниот посредник во преговорите меѓу Путин и Трамп.
Путин и Вучиќ се сретнаа накратко вчера во Кремљ на прием за светските претставници кои пристигнаа во Москва за да присуствуваат на прославите на Денот на победата.
Вучиќ претходно денес присуствуваше на воената парада на Црвениот плоштад во Москва, која беше организирана по повод Денот на победата во Втората светска војна, а на која учествуваа повеќе од 11.500 војници на Министерството за одбрана на Русија и други безбедносни структури.