Рускиот претседател Владимир Путин е отворен за мир во Украина и во тек е интензивна соработка со САД, но конфликтот е толку сложен што е тешко да се постигне брзиот напредок што Вашингтон го сака, соопшти денеска Кремљ.
„Претседателот останува отворен за политички и дипломатски методи за решавање на овој конфликт“, изјави за новинарите портпаролот на Кремљ, Дмитриј Песков.
Тој рече дека целите на Русија мора да се постигнат и дека Москва претпочита да ги постигне овие цели по мирен пат. Тој рече дека Путин изразил подготвеност да се вклучи во директни преговори со Украина, на што Киев досега не одговорил.
„За жал, не слушнавме никакви изјави во овој контекст од Киев. Затоа, не знаеме дали Киев е подготвен или не“, изјави Песков.
