Најмалку 10 товарни вагони, што превезувале сурова нафта, вчера излетале од шините во американската сојузна држава Висконсин, пренесе ТАСС.
Според податоците на компанијата оператор „Канејдиан Пацифик Рејлвеј“ (Canadian Pacific Railway) инцидентот се случил во реон на градот Вотертаун, во југоисточниот дел на државата.
Причините за инцидентот засега не се познати, но хаваријата се случила во дел од железничката пруга каде неодамна бил правен ремонт. Од некои вагони има истечено гориво, но за големината на еколошката хаварија засега не се зборува. На местото на настанот веќе работат полицијата и спасувачките служби.
Во саботата, во западниот дел на Висконсин, од шините излетаа над 30 вагони од друг товарен воз, што превезувал етанол. Во хаваријата што се случи во близина на градот Алма, по течението на Мисисипи, од возот истекоа над 75 000 литра етанол.
Компанијата Би-Ен-Ес-Еф (BNSF) во неделата етанолот го преместуваше од превртените вагони, што се обидуваше да ги врати назад на шините. Во инцидентот немаше настрадани.