Вкупно 50 лица загинаа, од кои 48 деца во денешниот судар на воз со автобус во долината на Нил, јужно од Каиро. Двајцата возрасни се возачот и воспитувачот, кој ги придружувал децата.
Во автобусот патувале околу 60 деца на возраст од пет до 11 години, кои оделе на организирана екскурзија. Во несреќата, едно семејство загубило пет деца, а друго – две.
Десетици лекари се борат за животот на седумнаесетмината преживеани.
Патнички воз, со полна брзина удри во автобусот изутринава, при што локомотивата целосно го смачка автобусот и го влечела неколку стотини метри по шините. На местото на несреќата се уште се расфрлани училишни чанти, тетратки, играчки, како и делови од човечки тела.
Според очевидци, возачот на автобусот не забележал дека доаѓа воз и навлегол на железничкиот премин, откако небрежен железничар не ја спуштил рампата.
Египетските железници соопштија дека лицето одговорно за преминот, грубо ги прекршил правилата, ја напуштил својата позиција и отишол да спие.
На местото на трагедијата се собраа десетици луѓе, загрижени за судбината на своите деца. Скршени од тага, луѓето не им дозволуваат на спасувачите и претставниците на локалните власти да дојдат до местото на несреќата, пречат во расчистувањето на остатоците од автобусот, бараат виновниците да бидат егзекутирани и сакаат оставка на владата, јави БТА.
Премиерот Хишам Кандил отпатува денеска во провинцијата Асјут, каде се случи несреќата. Египетскиот министер за транспорт Рашад ал Метин и директорот на Управата на железничкиот транспорт поднесоа оставки, кои беа примени од претседателот Мохамед Морси.
Шефот на државата им нареди на премиерот, на министрите за одбрана и за здравство и на гувернерот на провинција Асјут да им пружат секаква помош на семејствата на жртвите.
Тој побара внимателна истрага и сите виновници да бидат казнети.