Три лица се пронајдени мртви во семејна куќа во Монтабаур во германската покраина Северна Рајна Вестфалија. Како што потврдија од германската полиција, станува збор за убиство за кое е осомничен член на семејството.’
Трите лица пронајдени мртви во четвртокот во Монтабаур се таткото (68), маќеата (39) и полубратот (3) на убиецот. Ова го соопштија од полицијата и од државното обвинителство.
– Според досегашните информации, позадината на делото може да биде семејна расправија. Насилникот и жртвата живееле во иста куќа – вели државниот обвинител.
Во четвртокот наутро наводниот сторител Михаел Д.(37) накратко и се јавил на својата партнерка и и признал дека убил три члена од неговото семејство, јавуваат германските медиуми. Жената потоа ја известила полицијата.
Откако полицијата пристигнала во Монтабаур, напаѓачот прво се забарикадирал на местото на злосторството.
– Полицијата потоа го опколи целиот станбен простор за да се исклучи каква било опасност по животот или телото на трети лица – велат истражителите.
По неколкучасовни преговори со полицијата, осомничениот околу пладне си пукал во главата и со тешки повреди бил пренесен во болница, соопштија од полицијата. Во текот на попладневните часови лекарите констатирале мозочна смрт на 37-годишниот.