Полицијата во неколку земји од Европската унија открија шифрирана апликација за пораки што ја користеле криминалните банди, соопшти вечерва холандската полиција, додавајќи дека се уапсени 42 лица и дека биле откриени лаборатории за производство на дрога, лекови, пари и оружје.
Инспекторите ги спроведоа рациите во Белгија, Германија и Холандија по повеќе од две години истрага, која започна во септември 2020 година и ги доведе до исклучување на тајниот систем за пораки Exlu Messenger.
Холандската полиција соопшти дека истражителите пристапиле до податоците на оние шифрирани пораки што ги користеле криминалците и на тој начин можеле да ги читаат нивните пораки во изминатите неколку месеци.
Во таа истрага учествуваа полиции од Франција, Италија и Шведска, како и Европската полициска служба (Европол) и Европската агенција за судска соработка – Европравда.
Полицајците пронајдоа две лаборатории за дрога, фабрика за преработка на кокаин, како и неколку килограми дрога, четири милиони евра во готовина, луксузни предмети и оружје, пренесува Бета-Франс прес.
Апликацијата Exlu Messenger ја користеле околу 3.000 луѓе, од кои околу 750 зборувале холандски. Таа апликација беше инсталирана на паметни телефони и чинеше 800 евра за шест месеци.
„Таа апликација беше наменета за размена на пораки, фотографии, гласовни пораки, онлајн разговор и видеа“, соопшти холандската полиција.