Во главниот град на Индонезија Џакарта на 6 и 7 март ќе се одржи самитот на Организацијата за Исламска Соработка (ОИЦ) на кој ќе учествуваат 49 шефови на држави и влади на организацијата во која членуваат 56 држави. Тоа ќе биде вонреден собир на ОИЦ на највисоко ниво, а централна тема ќе биде палестинското прашање.
Министерката за надворешни работи на Индонезија Ретно Марсуди изјави дека на самитот ќе се расправа на неколку теми од соработката, а главната ќе биде усвојувањето на Декларација за решавање на палестинското прашање. Ретно нагласува дека Индонезија и во рамките на ОН е координатор на напорите за мир во Палестина, а идејата за тоа да се расправа во Џакарта ја предложил палестинскиот министер за надворешни работи Ријад Ал Малики.
Декларацијата од Џакарта треба да го врати вниманието на меѓународната заедница кон проблемот на Палестина, за чие решавање преговорите беа прекинати лани. Министерката Ретно очекува да се постигне и договор за соработка меѓу спротивставените Фатах и Хамас фракции.
Шефот на дипломатијата на Индонезија денеска на новинарите им соопшти дека наместо подобрување на условите за живот на Палестнците, тие се влошени. Особено е алармантна состојбата во Источен Ерусалим каде што, според Ретно, 75 отсто од Палестинците живеат под границата на сиромаштија, само 64 отсто имаат пристап до чиста вода, а со образование се зафатени 41 отсто од децата чија возраст бара школување.