Министерството за транспорт на Индонезија ќе почне истрага откако двајца пилоти на Батик Ер заспале за време на неодамнешниот лет, објави државната новинска агенција Антара, цитирајќи го генералниот директор на цивилното воздухопловство Кристи Енда Мурни.
Според прелиминарниот извештај објавен вчера од Националниот одбор за безбедност на транспортот (КНКТ), и пилотот и копилотот заспале истовремено 28 минути за време на летот од Кендари во југоисточна провинција Сулавеси до главниот град Џакарта на 25 јануари. Како резултат на тоа, имало грешки во навигацијата бидејќи „авионот не бил на правилната патека на летот“, објави агенцијата.
Никој во авионот, меѓу кои 153 патници и четворица членови на екипажот, не е повреден за време на летот, а нема оштетувања на авионот, се наведува во прелиминарниот извештај на КНКТ. Летот БТК6723 траел два часа и 35 минути и успешно слетал во Џакарта.
Според извештајот, копилотот претходно истиот ден го известил својот колега дека „не одмарал правилно“.
Откако авионот го напуштил Кендари и стигнал до посакуваната височина, главниот пилот побарал дозвола за одмор и копилотот го презел леталото. Околу 90 минути по полетувањето и копилотот „ненамерно заспал“, се вели во извештајот.
Дванаесет минути по последната комуникација на копилотот, од Центарот за контрола на областа Џакарта (ACC) се обиделе да стапат во контакт со авионот, но немало одговор. Приближно 28 минути по последната комуникација, главниот пилот се разбудил и сфатил дека авионот не е на правилната траекторија. Во тој момент го разбудил копилотот.
Во извештајот не се откриваат имињата на пилотите, само се наведува дека пилотот е 32-годишен Индонезиец, а копилотот е 28-годишен Индонезиец. Копилотот имал едномесечни близнаци и „морал да се буди неколку пати за да и помогне на својата сопруга околу бебињата“, се вели во извештајот.
Во извештајот, исто така, се наведува дека агенцијата ќе испрати инспектор за летање овластен да се справува со безбедносните прашања за да ги истражи причините за инцидентот и да препорача мерки за ублажување на заморот на пилотите, објави Антара.