Приближно 180 украински војници биле убиени во изминатиот месец во битката за Дебалцево, а над 80 и натаму се водат за исчезнати, соопшти денеска советник на претседателот Петро Порошенко.
Како што пренесуваат француските медиуми, од 18 јануари до 18 февруари во борбите за невралгичниот железнички јазол во источниот дел на земјата загинале точно 179 украински војници и офицери, напиша на својата страница на Фејсбук Јуриј Бирјуков.
Проруските сепаратисти заробиле уште 110 војници , а судбината на 81 се уште останува непозната.
Ова битката за Дебалцево ја прави најсмртоносна за киевските сили од избувнувањето на конфликтот во источна Украина во април минатата година.
Украинските сили во средата се повлекоа од градот.
Во конфликтот, што веќе трае 10 месеци, во борбите вкупно се убиени приближно 5.700 лица.