За првпат по оспорените претседателски избори во летото 2020 година и масовните протести што следеа, во Белорусија под авторитарно раководство на Александар Лукашенко денеска се одржуваат општи избори.
Покрај 110 претставници во националниот парламент, се избираат и околу 12.000 претставници на локалните собранија. Соработниците на долгогодишниот владетел Лукашенко не одобрија независни набљудувачи на изборите.
Според аналитичарите, 69-годишниот Лукашенко првенствено сака да го искористи гласот за да покаже дека има целосна контрола по протестите пред три и пол години.
Лидерката на белоруската опозиција Светлана Тихановска, која побегна во странство, во четвртокот истакна дека изборите немаат врска со демократијата.
„Тоа е фарса, тоа е шоу, тоа е циркус, но тоа не е избор“, тврди Тихановска.
Таа се осврна и на бројни политички затвореници во Белорусија. Активистите за човекови права наведуваат дека ги има повеќе од 1.400.
Во август 2020 година, претседателот Лукашенко, кој е на функција од 1994 година, беше прогласен за победник на претседателските избори. Опозицијата, пак, ја виде Тихановска како вистински победник.
ЕУ, исто така, повеќе не го признава Лукашенко за шеф на државата. Во неделите по изборите имаше масовни протести, кои беа сурово задушени од моќниот државен апарат. Тогаш беа уапсени повеќе од 35.000 луѓе.
Се верува дека Лукашенко е целосно зависен од Русија и од лидерот на Кремљ Владимир Путин.