Белгиската Влада денеска одлучи да распореди дополнителни 300 војници на улиците на градовите ширум Кралството Белгија, а по одлуката да се зголеми степенот на безбедност во земјата на Трето ниво од вкупно четири, јави дописникот на МИА од Брисел.
– Денеска ќе бидат распоредени дополнителни 300 војници, покрај 220-те војници што веќе одамна патролираат на улиците во белгиските градови. Во деновите што следуваат, белгиската полиција и Кризниот центар постојано ќе вршат проценка на состојбата и за потребните капацитети. Министерството за внатрешни работи ќе одлучи за тоа каде ќе бидат распоредени војниците за да им помогнат на полицајците – се вели во соопштението на Владата на Кралството Белгија.
Присуството на припадници на белгиската Армија на улиците во градовите во оваа земја, всушност не е престанато уште по нивното распоредување по настаните во градот Вервие на почетокот на оваа година, кога во анти-терористичка операција, полициските специјални единици убија двајца, а уапсија неколкумина терористи што планирале напади врз полициски станици и врз полицајци. Токму пред институциите на Европската унија и на НАТО во Брисел, како и пред амбасадите на САД, Израел и на земји-членки на ЕУ, белгиски војници под целосно вооружување патролираат непрестано веќе десет месеци.