Специјалниот претставник на САД за Блискиот Исток, Стив Виткоф, изјави дека, со сето должно почитување кон израелскиот премиер Бенјамин Нетанјаху, американскиот претседател Доналд Трамп би можел да биде и премиер на Израел во исто време.
Виткоф изјави дека во средата имал телефонски разговор со Нетанјаху, објави „Тајмс оф Израел“.
Зборувајќи во Њујорк на церемонија за израелската волонтерска служба за брза помош „Јунајтед Хацалах“, Виткоф ја пофали поддршката на Трамп за Израел.
„Тој е толку посебен човек, тој е неверојатен пријател на еврејскиот народ. Не сакам да звучам непочитувачки кон Нетанјаху, со кого всушност разговарав денес, но мислам дека Трамп би можел да биде првиот американски претседател кој би можел да биде и премиер на Израел во исто време“, рече Виткоф.
Зборувајќи за Иран, Виткоф рече дека на Техеран „никогаш не смее да му се дозволи да збогатува ураниум или да развива каков било вид нуклеарен капацитет“.
Виткоф оцени дека Иран со нуклеарно оружје и голем број ракети би претставувал егзистенцијална закана за Израел, САД и светот.
„Мораме да бидеме решителни и обединети против оваа опасност и да се осигураме дека Иран никогаш нема да добие средства за да ги оствари своите амбиции, без оглед на цената“, рече Виткоф.