Украинскиот претседател Володимир Зеленски денеска при враќањето од САД на аеродромот Жешов-Јасионка на југоистокот на Полска се сретна со својот полски колега Анджеј Дуда.
– На враќање, сретнав пријател на Украина, полскиот претседател Анджеј Дуда, напиша Зеленски на социјалните мрежи.
Зеленски рече дека тој и неговиот полски колега разговарале за изминатата година и стратешките планови за иднината и билатералните односи.
Украинското претседателство прецизираше дека средбата се одржала во Жешов, во југоисточна Полска, транзитен град за голем дел од помошта наменета за Украина, чиј аеродром е заштитен од американскиот воен контингент, а Зеленски оттаму отпатувал за Вашингтон.
Средбата беше одржана еден ден по посетата на Зеленски на Вашингтон, што беше негово прво патување во странство од почетокот на руската инвазија на Украина на крајот на февруари.