Во украинското село Петропавливска Боршчахивка, во предградието на Киев, дојде до судир откако цивили се собраа пред објект во кој се сместени припадници на Националната гарда на Украина.
Според Првиот корпус „Азов“ на Националната гарда, собирот се случил откако се прошириле непотврдени информации дека во привременото сместувалиште војници се држат незаконски и се изложени на тортура.
Од Националната гарда наведоа дека дел од војниците во објектот биле неодамна мобилизирани, додека други биле задржани откако неовластено ги напуштиле своите воени единици, чекајќи прераспоредување во други единици. Четворица војници се здобиле со повреди и биле пренесени во болница на лекарски преглед.
Националната полиција потврди дека интервенирала на лице место, но ги отфрли тврдењата дека поединци се држат незаконски или дека имало смртни случаи. Полициски службеници биле испратени на локацијата по повик од вработен во приватна служба за брза помош, кој пријавил дека му бил оневозможен пристап до маж кој се наоѓал внатре во објектот.
Според извештај на „Киев индепендент“ (*The Kyiv Independent*), голема група луѓе се собрала пред зградата за да протестира против наводното незаконско притворање на десетици мажи. Демонстрантите фрлале јајца кон полицајците и припадниците на Националната гарда, а потоа се обиделе да го пробијат обезбедувањето и да влезат во објектот. Безбедносните сили одговориле со употреба на солзавец и со испукување предупредувачки истрели во воздух. На лице место пристигнале и засилувања на Националната гарда.
Според полицијата, на локацијата бил испратен автобус за транспорт на околу 15 лица кои се наоѓале во зградата. На социјалните мрежи се појавија снимки од напнатата ситуација, додека одредени канали на „Телеграм“ пренесоа – иако ова останува непотврдено – дека вооружени лица држат околу 40 луѓе како заложници во подрумот.
Украинскиот министер за внатрешни работи, Иван Вихивски, изјави дека на членовите на семејствата на војниците им е овозможено да комуницираат со нив, а на лице место се повикани медицински персонал и претставници на јавноста.
Украинскиот воен омбудсман, Олга Решетилова, изјави дека е во тек истрага и дека ќе се утврдат сите околности поврзани со инцидентот. Таа напомена дека сите воени лица се безбедни и добиваат медицинска помош.
Кирило Буданов, шеф на Кабинетот на претседателот на Украина, пристигна на лице место синоќа околу 22:00 часот по локално време. Тој изјави дека дошол за да утврди што се случило, при што наведе дека во зградата имало 14 воени лица, а демонстрантите ги попречиле обидите за транспорт на ранетите војници.
Буданов истакна дека не смее да се дозволи да дојде до ваква ситуација.