Рускиот опозиционер Алексеј Навални е приведен веднаш по слетувањето на неговиот авион со кој од Берлин се врти во Москва. Информацијата ја потврдија Федералната служба за извршување казни како и неговиот адвокат.
Video footage of the arrest of @navalny. #Navalny #Russia https://t.co/g9zJxEnqw5
— Yashar Huseyn (@yasharhuseyn) January 17, 2021
Првично пилотот најавил доцнење од 30 минути поради „технички проблеми“, а потоа ги известил патниците оти авионот е пренасочен и оти ќе слета на московскиот аеродром Шереметјево.
Претходно, полицијата уапси околу 10 приврзаници на опозиционерот Алексеј Навални, кои го чекаат на аеродромот Внуково. Меѓу уапсените е и опозициската политичарка Љубов Собољ.
Навални и покрај заканата да биде затворен, тој денеска полета од Берлин, каде му беше укажана лекарска помош откако во август минатата година беше отруен со нервен агенс „Новичок“.
Претходно, официјална Москва го предупреди Навални дека ако до 30 декември не се врати во Русија, ќе биде уапсен бидејќи не ги испочитувал обврските за условните казни.
Навални има две условни казни по пет години за случаите „Кировлеса“ и за „Ив Роше“. Во првиот случај е обвинет за проневера од над 16 милиони рубљи (околу 180.206 евра), а за вториот за проневерени повеќе од 30 милиони рубљи (околу 337.886 евра).