Шпанскиот премиер Педро Санчез предупреди дека Израел повторно го прекршил меѓународното право со заробување на 175 активисти во води што не му припаѓаат и ја повика ЕУ да го суспендира договорот со земјата. „Израел повторно го крши меѓународното право со напаѓање на цивилна флотила во води што не му припаѓаат“, порача Санчез на социјалните медиуми.
Израелската војска пресретна повеќе од 20 бродови во меѓународни води крај Грција во средата навечер и приведе 175 лица, вклучувајќи околу 30 Шпанци.
„Нашата влада прави сè што е потребно за да ги заштити и помогне притворените Шпанци, но тоа не е доволно. ЕУ мора веднаш да го суспендира договорот за партнерство и да побара од Нетанјаху да го почитува законот на нашите мориња“, напиша Санчез.
Во неделата, околу 60 бродови со меѓународни активисти и хуманитарци тргнаа од италијанскиот остров Сицилија во обид да ја пробијат поморската блокада што ја наметна Израел во 2007 година. Конвојот се стреми да отвори постојан хуманитарен коридор до опколениот Појас Газа.
Израел го нарече тоа „провокација“. „Нашите храбри војници на ИДФ дејствуваат професионално и решително наспроти група пореметени агитатори кои бараат внимание“, напиша израелскиот претставник во ОН, Дени Данон, на X.
Преостанатите 32 брода го продолжуваат своето патување кон Појасот Газа. Ним треба да им се придружат по десет брода од Грција и Турција, објави флотилата.
Шпанија и десет други земји, вклучувајќи ги Бразил, Колумбија, Турција и Јужна Африка, во четврток издадоа заедничка декларација барајќи итно ослободување на активистите „чија мирна и граѓанска иницијатива од хуманитарна природа има за цел да го привлече вниманието на меѓународната заедница кон хуманитарната катастрофа во Газа“.
„Израелските напади врз бродови и нелегалното притворање на хуманитарни активисти во меѓународни води претставуваат јасни прекршувања на меѓународното право и меѓународното хуманитарно право“, рекоа тие.