Израелските воздушни напади во јужен Либан убија најмалку 19 лица, соопшти Министерството за здравство на земјата. Во еден од нападите, кој погоди куќа во градот Деир Канун, загинаа 10 лица, вклучувајќи три деца и три жени. Либан се вклучи во конфликтот на 2 март, кога Хезболах, шиитска исламистичка група поддржана од Иран, испука ракети кон Израел како одмазда за воздушните напади на САД и Израел во кои беше убиен врховниот лидер на Иран, објави Би-Би-Си.
Good morning from glorious South Lebanon. pic.twitter.com/2qucJRSM41
— Hadi Hoteit | هادي حطيط (@HadiHtt) May 20, 2026
Најновите жртви доаѓаат помалку од една недела откако САД соопштија дека Либан и Израел се согласиле да го продолжат 45-дневниот прекин на огнот, а разговорите меѓу двете страни треба да продолжат на почетокот на јуни. И покрај продолжувањето, Израел и Хезболах продолжија да разменуваат оган, особено во јужен Либан.
Израел вели дека ги таргетира членовите на вооружената група Хезболах, но нападите често убиваат цивили, вклучувајќи жени и деца. Хезболах испукува ракети и беспилотни летала кон населби во северен Израел и кон израелските сили што окупираат делови од јужен Либан. Либанското Министерство за здравство соопшти дека покрај убиените во Деир Канун, се ранети и три лица, вклучувајќи едно девојче.
Уште девет лица беа убиени, а 29 повредени во воздушните напади врз областите Набатија и Тир. Израелската војска соопшти дека уште еден војник е убиен во напад на Хезболах во јужен Либан.