Американскиот претседател Барак Обама денеска изјави дека со новоизбраниот шеф на украинската држава Петро Порошенко го разгледал планот на Киев за враќање на мирот, засилување на економскиот раст и намалување на енергетската зависност на Украина од Русија.
По средбата, Обама изјави дека со Порошенко разговарале и за тоа како САД да помогнат во обуката на украинската армија и полиција.
Американскиот претседател го информирал Порошенко дека воената помош од САД може да вклучува и давање уреди за ноќно набљудување (визири). Украинците бараат повеќе помош заради стравувањата од руска интервенција во Украина.
Обама, исто така, изјави дека е важно претстојната средба на Г-7 да покаже дека меѓународната заедница стои зад Порошенко.
Порошенко синоќа, како што јави ДПА, ја поздрави солидарната позиција на Западот за конфликтот меѓу Украина и Русија.
– Гледаме дека во овој момент цел свет е на наша страна. Агресорот е осуден на изолација, рече тој.