Властите на Уганда запленија 750 парчиња слонови коски и илјадници лушпи од панголин, кои биле шверцувани од соседниот Јужен Судан, а станува збор за една од најголемите заплени од таков вид во таа источна африканска земја.
Двајца Виетнамци се уапсени поради криумчарење, кои слоновите коски и лушпите ги сокриле во дрвја и ги превезувале во три контејнери.
Слоновите коски и лушпите од панголини најверојатно биле собрани во соседно Конго, а биле откриени со помош на скенер.
Африканскиот панголин сè повеќе е на мета на ловокрадци, бидејќи неговите лушпи се користат во традиционалната медицина во некои африкански земји.
Африканските слонови се позагрозени поради побарувачката за производи од слонова коска во Кина и другите азиски земји.
Африка во седумдесеттите години на минатиот век имаше 1,3 милиони слонови, додека денес има помалку од 500.000, а експертите предупредуваат дека нивната популација би можела да опадне многу ако не биде спречена трговијата со слонови коски.