Триесетгодишна жена е застрелана во центарот на градот Шефилд, а британската полиција уапси три лица под сомнение за убиство, соопшти полицијата на Јужен Јоркшир.
Пукањето, според Скај њуз, се случи на Вест Стрит, област од градот позната по ноќниот живот и големиот број студенти на Универзитетот Шефилд. Жената е однесена во болница со сериозни повреди, каде подоцна почина. Полицијата уапси маж (30) и жена (32) кратко по инцидентот во близина на Стокпорт во Голем Манчестер, додека друг 30-годишен маж е уапсен во Шефилд. Сите осомничени се во притвор.
Помошникот комесар Колин Мекфарлан рече дека инцидентот е „разорувачки“ и изрази сочувство до семејството и пријателите на убиената жена.
– Нашите полицајци интензивно работат на утврдување на сите околности на пукањето. Истрагата е сè уште во рана фаза, но ќе одржиме високо полициско присуство на местото на настанот во наредните денови, рече Мекфарлан.
Тој ги повика сведоците да се јават и рече дека „сега не е време да се молчи“.
„Насилството со оружје предизвикува незамисливи трагедии, а жртвата и нејзиното семејство заслужуваат одговори. Ќе направиме сè што можеме за да ги изведеме одговорните пред лицето на правдата“, нагласи Мекфарлан.