Турската полиција уапси 161 осомничен член на групата Исламска држава (ИД) во текот на изминатата недела, изјави денес министерот за внатрешни работи Али Јерликаја.
„Осомничените биле активни во рамките на групата и обезбедувале финансиска поддршка. Запленети се пиштоли без дозвола, ловни пушки без дозвола, бројни организациски документи и дигитални материјали“, рече Јерликаја во објава на платформата за социјални медиуми X.
Тој рече дека како резултат на работата на одделенијата за борба против тероризмот на покраинските полициски одделенија, се спроведени операции во 36 градови, вклучувајќи ги Анкара и Истанбул.
„Им честитам на нашите главни јавни обвинителства, на Турската национална полиција, на Дирекцијата за разузнавање, на Националната разузнавачка организација, началниците на покраинските полиции и на полицијата. Ние продолжуваме со нашите операции без прекин за мирот и безбедноста на нашата нација“, рече Јерликаја.
Групата Исламска држава изврши бројни напади врз Турција во текот на изминатата деценија, вклучувајќи го и бомбашкиот напад во Анкара во 2015 година во кој загинаа повеќе од 100 лица, како и нападот на аеродромот во Истанбул една година подоцна во кој загинаа 45 лица.