Турција денеска уништи арсенал и командна позиција кои им припаѓаат на терористички групи, јави турската државна агенција „Анадолија“ во момент кога курдската милиција во Сирија ја обвинува Анкара дека бомбардирала нејзини цели.
Агенцијата не наведува дали турските сили ги гаѓале целите со артилериско оружје или од авион, ниту кои групи биле цел на нападите, но нагласи дека се погодени цели јужно од градот Џараблус, кој протурските бунтовници во средата го презедоа од џихадистите.
Прокурдските бунтовници во Сирија претходно соопштија дека биле мета на турски воздушни напади, а истовремено Сирискиот центар за мониторинг на човековите права истакна дека борци кои ги поддржуваат Курдите се судриле денеска со турските тенковски сили во северниот дел на Сирија, во близина на границата со Турција.
Турција ги смета прокурдската милиција – Единици за народна заштита и Курдската партија за демократска унија за терористички групи кои планираат да создадат автономна курдска област во Сирија, иако тие соработуваат со САД во борбата против Исламска држава.