Протестот пред хотел во северозападна Англија, каде што се сместени странци кои бараат азил, синоќа стана насилен, по што се уапсени три лица.
Полицијата во Мерсисајд соопшти тие се уапсени за „инциденти поврзани со безредија“ во близина на хотел во Ноузли, недалеку од Ливерпул.
Официјални лица за спроведување на законот соопштија дека протестот започнал мирно заедно со контрапротестот за поддршка на бегалците.
Полицијата прецизира дека нема сериозно повредени, но насилството било „целосно неприфатливо“.
Според локалниот пратеник Џорџ Хауарт, демонстрациите биле предизвикани од „наводен инцидент на социјалните мрежи“.
– Жителите на Ноузли не се фанатици и ги поздравуваат луѓето кои бегаат од некои од најопасните места во светот во потрага по безбедност. Овие демонстрации против бегалците на вечерашниот протест не се репрезентативни за нашата заедница, истакна синоќа пратеникот.
Велика Британија прима помалку баратели на азил од нејзините европски соседи, вклучително и Франција и Германија, но забележа нагло зголемување на бројот на луѓе кои се обидуваат да стигнат до земјата преку Ла Манш со мали чамци.