Републиканскиот кандидат за претседател на Соединетите Американски Држави на претстојните избори во ноември, Доналд Трамп, денеска најави дека доколку победи, „веднаш ќе ја запре инвазијата на мигрантите во Америка“.
„Како претседател, веднаш ќе ја прекинам инвазијата на мигрантите во Америка. Ќе ги запреме сите летови на мигранти, ќе ставиме крај на сите нелегални влезови, ќе ја затвориме апликацијата CBP One App на Камала за кримчарење мигранти, ќе го одземеме имунитетот од депортација, ќе го суспендираме преселувањето на бегалците и ќе ги вратиме илегалните имигранти на Камала во нивните матични држави“, напиша Трамп на платформата Х.
Тој додаде дека „ќе ги спаси американските градови во Минесота, Висконсин, Мичиген, Пенсилванија, Северна Каролина“, како и остатокот од Америка.
Трамп неодамна за време на дебата со демократската ривалка Камала Харис на телевизијата ABC рече дека милиони луѓе влегле во САД и дека тоа довело до зголемување на криминалот.
„Милиони луѓе дојдоа, а криминалот паѓа низ целиот свет. И овде го пробива плафонот. Тоа се нарекува имигрантски криминал“, рече Трамп.