Доналд Трамп и натаму одбива да ги прифати резултатите од минатонеделните претседателските избори во САД, на кои победи демократскиот кандидат Џо Бајден, па денеска повторно се огласи на Твитер и напиша „ЌЕ ПОБЕДИМЕ“.
Истовремено, неговиот заменик, потпретседателот Мајк Пенс, отпатува на Флорида од „лични причини“ наместо да се приклучи на правната битка во „колебливите“ држави, каде мнозинството, според официјалното пребројување на гласовите, не го заокружи нивното име на гласачкото ливче.
Весникот „Индепендент“ посочува дека од средата изутрина, Пенс не се експонира во јавноста и наместо да се вклучи во правната битка за оспорување на резултатите, тој одлучил да замине на Флорида, каде ќе остане до сабота.
Во меѓувреме, американскиот јавен обвинител Вилијам Бар се согласи федерални обвинители да ги истражат тврдењата за наводни масовни изборни нерегуларности.
Иако најголемиот дел од светските лидери веќе му ја честитаа победата на Бајден по проекцијата дека освоил најмалку 270 електорски гласови неопходни за да биде избран, Трамп и неговите соработници продолжуваат да се борат, наведувајќи дека зборот „пораз“ го нема во нивниот речник. Портпаролката на Белата куќа оцени дека изборите „се далеку од завршени“.
Во бројните денешни твитови, Трамп, исто така се обиде да ја преземе заслугата за развојот на вакцината против коронавирусот на „Фајзер“, оценувајќи дека само поради него таа ќе биде достапна до крајот на годината.