Почина човекот кој се самозапали пред судот во Њујорк каде што му се суди на поранешниот американски претседател Доналд Трамп, објави NBC News. Максвел Азарело бил „прогласен за мртов од болничкиот персонал“, потврди полицијата за NBC News.
Времето на смртта не е дадено. Азарело, маж во средината на 30-тите години од Сент Августин, Флорида, фрлал памфлети со теорија на заговор во воздух пред да се самозапали вчера во област наменета за демонстранти за и против Трамп.
Тој од торбата извадил канистер за кој се верува дека има запалива течност, а потоа со него се самозапалил, соопшти полицијата. Полицајци и цивили втрчаа во зоната на протестот и се обидоа да го изгаснат пламенот користејќи палта и противпожарни апарати.
Четворица полицајци се здобиле со полесни повреди од изложување на огнот, соопштија властите.
Џозеф Кени од NYPD им рече на новинарите: „Изгледа дека памфлетите се засновани на пропаганда, всушност некаква теорија на заговор. Некои информации во врска со шемата на Понзи и тврдењето дека некои од нашите локални образовни институти се покритие за мафијата“.
Човекот се запали по изборот на поротата за судењето на Трамп. 12 поротници и шест заменици се избрани да одлучат дали поранешниот американски претседател ги криел исплатите на жените кои тврделе дека имаат афери со него.
Кампањата на Трамп вчера објави соопштение во кое изразува „сочувство до трауматизираните сведоци“ по пожарот.