Американскиот претседател Доналд Трамп денес објави дека во понеделник ќе разговара телефонски со рускиот претседател Владимир Путин, како и со украинскиот претседател Володимир Зеленски.
„Во понеделник, во 10:00 часот, ќе разговарам по телефон со претседателот на Русија, Владимир Путин. Темите на разговорот ќе бидат запирање на „крвопролевањето“ во кое просечно гинат повеќе од 5.000 руски и украински војници неделно. Потоа ќе разговарам со претседателот на Украина, Зеленски“, рече Трамп во објава на социјалната мрежа TruthSocial.
Трамп додаде дека по разговорите со рускиот и украинскиот претседател, ќе разговара и со „различни членки на НАТО“.
„Се надевам дека ќе биде продуктивен ден, дека ќе има примирје и дека оваа многу насилна војна, војна што никогаш не требаше да се случи, ќе заврши. Бог да нè благослови сите“, рече Трамп.