САД не треба да се мешаат во грчката финансиска криза, изјави милијардерот и кандидат за американски претседател Доналд Трамп во интервју за телевизискиот канал „Фокс бизнис“.
– Не би се мешал и премногу активно учествувал… На Германија би и препуштил да излезе на крај со проблемот. Ние имаме доволно свои проблеми, изјави Трамп, одговарајќи на прашање на водителката „што САД треба да преземат во врска со ситуацијата во Грција“.
Според него, САД не треба да заборават дека „цела ситуација со еврото“ е создадена за да може да им се конкурира на САД.
– Германија ќе се погрижи за тоа. Искрено зборувајќи, Владимир Путин веројатно ќе се приклучи и ќе ја спаси ситуацијата (во Грција), доколку Германија не успее во тоа. Така што мислам дека Грција ќе биде во подобра ситуација отколку што луѓето претпоставуваат, наведе претседателскиот кандидат и додаде дека САД не можат да се мешаат во секој проблем.
Вкупниот долг на Грција, според податоците на грчкото Министерство за финансии од 1 април 2015 година, изнесуваше 312,7 милијарди евра.