Франција, Германија и Велика Британија (Е3) предупредија дека се подготвени да активираат механизам за повторно воведување санкции врз Иран доколку Техеран не се врати на разговорите со САД за неговата нуклеарна програма до крајот на август оваа година.
Во писмо до генералниот секретар на ОН, Антонио Гутереш, и Советот за безбедност на ОН, министрите за надворешни работи на Е3 изјавија дека би можеле да го продолжат рокот доколку Иран ги продолжи разговорите и соработува со Меѓународната агенција за атомска енергија (МААЕ).
„Јасно ставивме до знаење дека доколку Иран не е подготвен да постигне дипломатско решение до крајот на август 2025 година или не ја искористи можноста за продолжување, Е3 е подготвена да активира механизам за брзо повторно воведување санкции“, наведоа министрите во писмото, кое го доби „Фајненшл тајмс“.
Е3 тврди дека има „јасна и недвосмислена“ правна основа за мерката, велејќи дека од 2019 година Иран намерно ги поништува своите обврски од нуклеарниот договор од 2015 година, кој е во криза откако САД еднострано се повлекоа во 2018 година.
Техеран ги отфрла заканите, обвинувајќи ги европските сили дека не ги исполнуваат своите обврски и барајќи гаранции од САД дека нема да бидат нападнати за време на какви било идни преговори, како и надомест за воена штета.
Иранскиот министер за надворешни работи, Абас Арагчи, ја обвини Е3 дека не ги исполнува своите обврски од договорот од 2015 година и рече дека механизмот за враќање на санкциите „веќе не е толку важен“.
„Во моментов нема причина да се преговара со Европејците, бидејќи тие не можат да ги укинат санкциите, не можат да сторат ништо. Ако се вратат на својата позиција, тоа значи дека ова е крајот на патот за нив“, рече Арагчи.