Талибанците соопштија денеска дека ќе учествуваат на „меѓуавганистански преговори“ во Москва каде се очекува да се соберат водечки авганистански фигури меѓу кои и поранешниот авганистански претседател Хамид Карзаи, опозициски претставници и племенски старешини. Во тие разговори се очекуваат и претставници од Владата во Кабул.
Средбата ќе почне утре како нов чекор во напорите за крај на 17-годишната војна во Авганистан.
Процесот за прекин на конфликтот се забрза по назначувањето на американскиот претставник за мир, Залмај Халилзад во септември. Тој води посебни преговори со талибанците и покрај тоа што настојува за дијалог во кој би учествувале клучните авганистански претставници.