Претседателот на Европскиот парламент, Антонио Тајани изјави дека „времето на популизмот е завршено“, а доказ за тоа се резултатите од парламентарните избори во Велика Британија.
– Ако пораките не се реализираат, тогаш се јавува разочарување. Избирачите забележаа дека Брисел не може да биде виновен за се. Изборите во Велика Британија покажаа дека времето на популизмот заврши. Тоа се случи и во Франција, Австрија и Холандија, истакна Тајани во интервју за италијанскиот весник „Кориера дела сера“.
Според него, загубата на парламентарното мнозинство од премиерката Тереза Меј покажува дека преговорите за излез на Лондон од ЕУ нема да бидат толку тешки.
– Перспективата за т.н. „тврд Брегзит“ е блокирана. Важно е во Британија да има силна влада, со која ЕУ ќе води отворен дијалог, а имајќи го тоа предвид Лондон да остане важен партнер за решавање на клучни проблеми, како на пример миграцијата и борбата против тероризмот, нагласи Тајани.
Тој додаде дека најважен услов во преговорите ќе биде да се гарантираат правата на Европејците во Велика Британија, откако таа ќе излезе од Унијата.