Северноатлантската алијанса, како најголема воено-политичка организација на светот и дава силна поддршка на Украина за нејзината независност и територијален интегритет и суверенитет, порача денеска генералнио секретар на НАТО, Јенс Столтенберг.
Како што јави дописникот на МИА од Брисел, Столтенберг го истакна ова по денешната средба со министерот за надворешни работи на Украина, Павло Климкин.
Првиот човек на Алијансата нагласи дека НАТО ќе продолжи со својата силна политичка и практична поддршка за Украина, но изрази загриженост во врска со неодамнешната ескалација на насилствата во земјата.
– Ние сме многу загрижени за ситуацијата, како и од континуираната поддршка од страна на Русија на сепаратистите. Го повторувам својот повик за почитување на прекинот на огнот. НАТО ги поддржува сите напори за да се најде мирно решение, врз основа на договорот од Минск, истакна Столтенберг.
Повторувајќи дека меѓународната заедница стои целосно на располагање за помош на Украинците, Столтенберг посочи дека и НАТО ќе продолжи да и помага на земјата.
– Ние ќе работиме со вас и даваме силна поддршка на независноста и територијалниот интегритет и суверенитет на Украина, додаде генералниот секретар на НАТО.