Џихадистите што војуваат во Сирија и Ирак по враќањето дома може да претставуваат опасност за безбедноста на Косово, предупреди денеска генералниот секретар на НАТО, Јенс Столтенберг, кој престојува во посета на Приштина.
– Враќањето на тие борци претставува опасност и за сите нас, за државите во регионот, но исто така и за сите земји во Европа, изјави Столтенберг на прес-конференција во Прштина по средбата со претставниците на косовските власти.
Тој апелираше на соработка, бидејќи, како што рече, потребно е „заеднички да се бориме против тероризмот“.
Косовската полиција во текот на август и септември уапси 55 лица под обвинение за поврзаност со џихадистите, за пропагирање на радикалниот ислам и за регрутирање доброволци за учество во „света војна“ во Сирија и Ирак.