Состојбата во Сирија е катастрофална. Владините податоци велат дека околу 298.000 Сиријци биле принудени да ги напуштат своите домови, објави државната новинска агенција САНА. Во земјата се отворени 180 прифатилишта за итни случаи.
Илјадници луѓе сè уште се водат како исчезнати, а оперативните спасувачки тимови и механизација за расчистување на остатоците остануваат итно потребни бидејќи долготрајната граѓанска војна и меѓународните санкции ја забавуваат испораката на помош во областите погодени од земјотресот.
Советникот на сирискиот претседател Башар ал Асад гневно го обвини Западот дека само испраќа хуманитарна помош до деловите на Сирија кои се под контрола на бунтовниците. Бутаина Шабан го опиша земјотресот како „катастрофа“, додавајќи дека многу луѓе сè уште се заробени под урнатините во деловите на земјата кои се под контрола на владата.
„Владата на Сирија и граѓаните на Сирија – од сите сфери на животот и од секој агол на Сирија – даваат се од себе за да помогнат“, рече таа. „За жал, Западот се грижи само за областите каде што се терористите – каде што се Белите шлемови – но не им е грижа за областите каде што живее мнозинството Сиријци“, рече таа.