Од под остатоците на зграда на југот на Турција извлечена е мачка, која поминала 49 дена под урнатините.
Разорни земјотреси ги погодија јужните региони на Турција на 6 февруари, со епицентар во провинцијата Кахраманмарас, од каде потекнува трогателната приказна за преживеаното милениче.
Сопственичката на мачката Нида Дина (36) и нејзината ќерка секојдневно доаѓаa до урнатините на зградата и ја бараa својата двегодишна мачка Хан.
– Зградата ни беше оштетена во првиот земјотрес и излегов со ќерка ми, но мачката не можевме да ја најдеме бидејќи некаде се сокри. Ја баравме секој ден и ја најдовме сега кога започна отстранувањето на урнатините на нашата единаесеткатница – изјави Дина.
Сопственичката рече дека е среќна поради чудото и додаде дека луѓето никогаш не треба да губат надеж бидејќи чуда навистина се случуваат.
– Хан моментално е во ветеринарната станица. Тој има проблеми со ногата и е на детален преглед. Се надевам дека ќе ги надмине сите проблеми – изјави Дина.
За мачката Хан претходно се грижеше и ветеринарката Фатма Ѓул Ханкуолу која е сега среќна што ја гледа жива 49 дена по земјотресот.