Кинескиот претседател Си Џинпинг на средбата со севернокорејскиот лидер Ким Џонг-ун изјави дека се надева дека во целост ќе биде применето тоа што е договорено во Сингапур.
Ким, кој е во дводневна посета на Пекинг, му се заблагодари на кинескиот претседател за поддршката за минатонеделниот состанок со американскиот претседател Доналд Трамп.
Тоа е трета посета на Ким на Кина годинава, што укажува на значителното подобрување на односите меѓу двете држави.
Севернокорејската новинска агенција КЦНА објави дека Ким истакнал оти односите помеѓу Пјонгјанг и Пекинг се развиваат во „специјални односи без преседан“.
Додека кинеските државни медиуми објавија дека Си на средбата со Ким навел дека преку конкретните напори од релевантните држави, преговорите за Корејскиот Полуостров се враќаат на правиот пат и целата ситуација се движи кон мир и стабилност. Тој посочи дека Кина секогаш ќе има конструктивна улога во тој процес.